मथितार्थ लक्षात घ्या

 अशा आंदोलनजीवी-परजीवींना, एकांगी पत्रकारिता करणार्‍या प्रसारमाध्यमांना, देशाच्या एकात्मतेवर घाला घालणार्‍या समाजमाध्यमातील आंतरराष्ट्रीय कंपन्यांना आपण ओळखायला शिकले पाहिजे आणि त्यांचे कुटिल हेतू उधळून लावले पाहिजेत. भारतीय नागरिक म्हणून ती आपली जबाबदारी आहे. पंतप्रधान आपल्याला तोच संदेश देत आहेत.

भारतीय लोकशाहीत आंदोलनाचे स्थान महत्त्वपूर्ण आहे. व्यापक जनहितासाठी वापरले जाणारे ते एक प्रभावी साधन आहे. महात्मा गांधी, डॉ. बाबासाहेब आंबेडकर यांच्यासारख्या महान नेत्यांनी विचारांच्या, तत्त्वांच्या भक्कम बैठकीवर समाजात सकारात्मक परिवर्तन घडवून आणण्यासाठी केलेल्या यशस्वी आंदोलनांचा इतिहास सर्वज्ञात आहे. मात्र, जेव्हा या शेतकरी आंदोलनाच्या आडून देशहित वा समाजहिताऐवजी नक्षलवाद्यांच्या, दहशतवाद्यांच्या सुटकेच्या मागण्या उघडपणे, हातात पोस्टर्स नाचवत केल्या गेल्या, तेव्हा हे आंदोलन मूळ हेतूपासून भरकटले असल्याची आणि अन्य घटकांच्या ताब्यात गेल्याची खात्री पटली. यामुळे सर्वसामान्यांच्या मनात आंदोलनकर्त्यांच्या, शेतकर्‍यांच्या हेतूविषयी शंका उत्पन्न झाली. प्रतिमा डागाळण्याचे हे काम त्यातल्या परजीवींनी, आंदोलनजीवींनी केले. तेव्हा शेतकर्‍यांच्या हिताचे काही व्हावे असे आंदोलकांना वाटत असेल, तर आंदोलनजीवींच्या वेढ्यातून त्यांनी हे आंदोलन सोडवण्याची गरज आहे.