घडलेय.. बिनसतेय!

ही गोष्ट साधारण सप्टेंबर २०१३मधली. त्या वेळी काँग्रेस आणि राष्ट्रवादी काँग्रेस हे दोन पक्ष युती करून राज्यात सत्तेत होते. केंद्रात डझनावारी पक्षांच्या कडबोळ्यातसुद्धा या दोघांचेच प्राबल्य होते. त्या वेळी काँग्रेसचे युवराज आणि तत्कालीन अध्यक्ष राहुल गांधी पुण्यात आले होते. आपल्या पक्षजनांना मार्गदर्शन करण्याच्या उदात्त हेतूने त्यांचे आगमन झाले होते. शिरस्त्याप्रमाणे काँग्रेसची तालेवार मंडळी आपापल्या समर्थकांना घेऊन त्यांना भेटून येत होती. ते बाहेर आल्यावर आम्हा पत्रकार मंडळींना आत काय घडलेय हे जाणून घेण्याची उत्सुकता असायची. मग पत्रकारांच्या मागणीवरून ते आतली वित्तंबातमी सांगायचे. त्यात हटकून एकच मुद्दा असायचा - राष्ट्रवादी काँग्रेसवर कुरघोडी कशी करायची? वास्तविक त्या वेळी अवघा देश भ्रष्टाचारांच्या विविध प्रकरणांनी गांजला होता, महागाई आकाशाला भिडली होती. विरोधी पक्षाच्या वतीने गुजरातचे मुख्यमंत्री नरेंद्र मोदी यांच्या रूपाने एक समर्थ प्रतिस्पर्धी उभा राहत होता. मात्र काँग्रेसजनांना चिंता पडली होती ती आपला 'मित्रपक्ष' राष्ट्रवादी काँग्रेसला नामोहरम कसे करायचे, याची!

तिकडे राष्ट्रवादीच्या कंपूतही काही वेगळे घडत नव्हते. काँग्रेसजनांना कसे लोळवायचे, हे बेत आखण्यातच त्यांचीही बहुतांश ऊर्जा खर्च होत होती. तेव्हाचे मुख्यमंत्री पृथ्वीराज चव्हाण आणि उपमुख्यमंत्री अजित पवार यांच्यातून विस्तवही जात नव्हता, हे उघड वास्तव होते. किंबहुना राष्ट्रवादीची मजल तर एवढी होती की निवडणूक जाहीर झाल्यावर कामचलाऊ सरकारमधून आपला पक्ष बाहेर पडत असल्याचे पक्षप्रमुख शरद पवारांनी जाहीर केले होते.

 

पाच वर्षांनी मिळालेली - खरे तर शिवसेनेच्या दगाबाजीमुळे पदरात पडलेली सत्ता या दोन पक्षांना आता सुखासुखी मानवत नाहीये. म्हणूनच एकमेकांवर कुरघोड्या करण्याचे त्यांचे जुने राजकारण पुन्हा उफाळून वर आले आहे.

काँग्रेसचे प्रदेशाध्यक्ष नाना पटोले आणि राष्ट्रवादी काँग्रेसचे अध्यक्ष शरद पवार यांच्यासहित अन्य नेत्यांमध्ये रंगलेला कलगीतुरा हे याचे उत्तम उदाहरण आहे. नाना पटोले यांनी महाराष्ट्र विकास आघाडी नावाच्या एका भंपक युतीतील सहभागी पक्षांबाबत अनेक आक्षेपार्ह वक्तव्ये केली. आपल्या हालचालींवर राज्य सरकार लक्ष ठेवत असून काँग्रेसच्या घोडदौडीमुळे राष्ट्रवादी काँग्रेस आणि शिवसेना घाबरले आहेत, अशी टीका पटोले यांनी केली होती. त्यामुळे राज्य सरकारच्या स्थिरतेवरच प्रश्‍नचिन्ह निर्माण झाले होते. ज्या दिवशी पटोले यांनी आपले हे वक्तव्याचे अस्त्र सोडले, त्याच दिवशी शरद पवार यांनी मोजक्या पत्रकारांशी संवाद साधला. त्यात "नाना पटोले यांच्यासारख्या छोट्या व्यक्तीच्या बोलण्यावर आपण प्रतिक्रिया देत नाही" असे त्यांनी सांगितले. पवार यांनी केलेली टिप्पणी तर वर्मी घाव घालणारी होती. याचे जे पडसाद उमटायचे ते उमटलेच.