हिंदूपणाची जाणीव हेच समस्यांचे उत्तर : सुनील आंबेकर

 

 

 

 सा. ‘विवेक’ सामाजिक परिवर्तनासाठी काम करणारे साप्ताहिक असून विविध ग्रंथ व पुस्तकाच्या माध्यमातून समाज प्रबोधनासोबत राष्ट्रीय विचाराचा प्रसार आणि प्रचार करत असते. त्यातील एक भाग म्हणजे ‘संघमंत्र के उद्गाता : डॉ. हेडगेवार’ हा अंक होय. या अंकाचे प्रकाशन बुधवार, दि. 22 सप्टेंबर रोजी राष्ट्रीय स्वयंसेवक संघाचे अखिल भारतीय प्रचार प्रमुख सुनील आंबेकर यांच्या हस्ते झाले. याप्रसंगी मुंबई महानगर संघचालक सुरेश भगेरिया, ‘हिंदुस्थान प्रकाशन संस्थे’चे अध्यक्ष रमेश पतंगे, ‘विवेक समूहा’चे प्रबंध संपादक दिलीप करंबेळकर आदी मान्यवर उपस्थित होते. या प्रकाशन सोहळ्याला विविध क्षेत्रांतील मान्यवर व संघ कार्यकर्ते उपस्थित होते.

 

 

 

या अंकाचा परिचय सा. ‘विवेक’चे सह कार्यकारी संपादक रवींद्र गोळे यांनी करून दिला. अंकाच्या प्रकाशनानंतर बोलताना सुनील आंबेकर म्हणाले, “आज संघ समजून घेऊ इच्छिणार्‍यांची संख्या वाढत आहे. जगाने संघाकडे आशेने डोळे लावले आहेत. संघ विचारात जगाला आशेचा किरण दिसतो आहे. आपल्या समस्यांवर संघच उत्तर देऊ शकतो अशी सामाजिक मानसिकता तयार झाली आहे. त्याचबरोबर संघाची कार्यपद्धती चांगली असून आपण संघाच्या सोबत गेलो तर बदल घडवून आणू शकतो हा सामाजिक अनुभव आता येतो आहे. याच्या मुळाशी डॉ. हेडगेवार यांची संघटनसूत्र, विचारसूत्र आहेत. आज डॉ. हेडगेवार यांच्या चरित्राबरोबरच विचारसूत्रांचा अभ्यास केला जातो आहे. आपल्या स्नेहपूर्ण व्यवहारातून डॉ. हेडगेवारांनी अनेक समाजधुरिणांना आपलेसे केले. सर्व समाजाला सोबत घेऊन आपल्याला पुढे जायचे आहे. ही त्यांची कार्यपद्धती होती. हिंदू समाजाच्या समस्या समाप्त व्हायच्या असतील, तर आपले हिंदूपण जागृत केले पाहिजे हे डॉक्टर हेडगेवारांनी दिलेल्या सूत्रांच्या आधारे संघ 96 वर्षे प्रवास करत आहेत. आज देश-विदेशात संघविचाराचे प्रकटीकरण होताना दिसत आहे. नुकत्याच पार पडलेल्या राम मंदिर निधी संकलन अभियानातून संघाचा विस्तार आणि समाजाची विश्वासार्हता या दोन्ही गोष्टींची अनुभूती आली. डॉ. हेडगेवारांनी दिलेली विचारसूत्र आपले ध्येय मानून काम करणारे संघ स्वयंसेवक प्रत्येक ठिकाणी उभे आहेत. कोरोना काळात याचा अनुभव आला आहे. जीवनाच्या प्रत्येक क्षेत्रात डॉक्टर हेडगेवारांच्या विचार सूत्राचे प्रकटीकरण करण्यासाठी अशा अंकाचा उपयोग होणार आहे.” प्रकाशन समारंभाचे प्रमुख पाहुणे सुरेश भगेरिया मार्गदर्शन करताना म्हणाले की, “डॉक्टर हेडगेवारांनी दिलेल्या विचारसूत्रावर काम करत आपण संघाच्या शताब्दीकडे जात आहोत. संपूर्ण जगाकडून संघविचार समजून घेण्यासाठी प्रयत्न चालू आहेत. देशासाठी जगणार्‍या संघस्वयंसेवकाच्या निर्मितीची ताकद डॉ. हेडगेवारांच्या विचार सूत्रात आहे. आज असे असंख्य संघस्वयंसेवक राष्ट्रसेवेसाठी तत्पर आहेत. त्यामागील प्रेरणा डॉक्टर हेडगेवार हेच आहेत. या प्रकाशन कार्यक्रमाचे सूत्रसंचालन सा. ‘विवेक’च्या कार्यकारी संपादक अश्विनी मयेकर यांनी केले, तर आभार अजय कोतवडेकर यांनी मानले. ‘वंदे मातरम्’ गायनाने कार्यक्रमाची सांगता झाली.